Yükləmə linki SMS ilə göndərildi. Təşəkkür edirik

Maariflən

Aqşin Əliyev: "Uğur qazanmaq üçün insanda özünə inam olmalıdır"

Aqşin Əliyev-Azərbaycanlı gənclərin Azərbaycan Böyük Britaniya Məzunları İctimai Birliyinin (AUKAA) üzvüdür. Onunla Oxu.az saytında dərc olunmuş müsahibəni təqdim edirik.

Aqşin bəy, AUKAA ilə tanışlığınız nə zamandan başlayıb?

- Demək olar ki, İngiltərə məzunu olan bütün dostlarım bu təşkilatın üzvüdür. Ona görə də AUKAA təşkilatdan çox, mənim üçün dostlarımın olduğu bir məkandır.

İngiltərədə hansı universitetdə təhsil almısınız? 

- İlk təhsilimi Bakı Dövlət Universitetində almışam. 2008-2010-cu illərdə İngiltərənin Gloucestershire Universitetində (Gloucester Universiteti) beynəlxalq biznes üzrə təhsilimi davam etdirdim. İlk olaraq İngiltərədə dil biliyimi inkişaf etdirdim, daha sonra universitetə müraciət etdim.

Xaricdə təhsil almaq mənə müsbət istiqamətdə o qədər təsir etdi ki, Azərbaycana qayıtdıqdan sonra da təhsilimi davam etdirdim. Doktoranturaya qəbul oldum. Elmi işimin müdafiəsi uğurla keçərsə ən gənc alim olacağam. Bütün bunlar çox fərəhləndirici hisslərdir. Eyni zamanda İngiltərədən qayıtdıqdan sonra universitetdə dərs deməyə başladım.

Daha sonra isə BMT-nin Azərbaycandakı nümayəndəliyində çalışdım. Bir müddət sonra isə yerli sığorta şirkətindən birində şöbə müdiri olaraq işləmişəm.

Xaricdə təhsil sizdə hansı təəssüratları yaratdı ki, məhz elm və təhsil sahəsini seçdiniz? 

- Orada hər kəs təhsilə olan marağı üçün universitetə gəlir. Mən ilk olaraq məsuliyyətlərimi dərk etdim. Uğur qazanmaq üçün insanda özünə inam olmalıdır və mən bu inamı İngiltərədə qazandım. Mən öz hesabıma xarici təhsil almışam. Ailəmin gözləntiləri vardı, təhsilimi başa vurub qayıtmalı idim.

Aqşin bəy, xaricdə təhsil Azərbaycan təhsil sistemindən fərqli olduğu üçün təhsilini yarıda qoyub qayıdanlar olur. Bəs sizin ilk vaxtlarda belə bir düşüncəniz olubmu?

- Əlbəttə, məndə də ilk vaxtlar belə düşüncələr olub. Lakin məsuliyyətimi dərk etdikdən sonra əsla bu fikirdə olmamışam. Orada insanın dünya görüşü artır, müxtəlif ölkələrdən olan insanlar tanıyırsan, dostlar qazanırsan. Oradakı dostlarımla hələ də əlaqələrimiz davam edir.

Qayıtdıqdan sonra hansı universitetdə dərs demisiniz? 

- Odlar Yurdu Universitetində bir semestr dərs dedim. Dissertasiya ilə bağlı isə uiversitetdə fəaliyyətimi dayandırmalı oldum. Hər gün 4-5 saat elmi işimlə məşğul oluram. Araşdırmalar aparıram. Bu səbəbdən də yalnız bu istiqamətdə fokuslanmışam.

Gənc alim olmaq, bu adı qazanmaq sizin üçün nə ifadə edir? Bəzən bu istiqaməti yalnız göstəriş üçün seçənlər də olur...

- Bəli, sizin dediyiniz hal da istisna deyil. Lakin bu sahəni seçməkdə 2 başlıca səbəb olub. Biri atamın mənə göstərdiyi etimaddır. Onun mənim həyatımda böyük rolu var, fikirləri mənim üçün çox önəmlidir. Digər səbəb isə bayaq da qeyd etdiyim kimi xaricdə aldığım təhsilin məndə bu sahəyə yaratdığı maraqdır.

Bəs gələcək planlarınız nədən ibarətdir? 

- Azərbaycan dövləti gənclərə böyük imkanlar yaradır. Mən də dövlətimə xidmət etmək istəyirəm. Bu istiqamətdə perspektiv qazanacağıma inanıram. Hesab edirəm ki, xaricdə təhsil almış hər kəs innovativ olmalıdır, köhnə yanaşmaları kənara qoyub, dövlətimizin getdiyi yeni və inkişaf yolunda dəstək verməlidirlər.

Dövlət qurumunda çalışmağa belə həvəs nə ilə bağlıdır?

- Gənclərin önə çəkilməsi son 10 ildir ki, dövlət siyasətinin prioritet istiqamətlərindən biridir. Demək olar ki, bütün dövlət qurumlarında gənclərə etimad göstərilir və təhsildə, ictimai həyatda fərqlənən gənclər önə çəkilir. 

Xüsusilə xaricdə təhsil almış gənc mütəxəssislərin önə çəkilməsi və onların təcrübəsindən istifadə müsbət nəticələrini verməkdədir. Məhz buna görə də mən dövlət qurumunda çalışmaq və qazandığım Avropa təcrübəsini ölkəmizdə tətbiq etməklə dövlətimə, millətimə xidmət etmək niyyətindəyəm.

Eyni zamanda pedoqoji fəaliyyətimi də davam etdirmək fikrindəyəm. Mən xaricdə təhsil almaq fikrində olan gənclərə də məsləhət görərdim ki, yeni sahələr üzrə təhsil alsınlar. İnformatika, dəqiq elmlər və s. sahələrdə peşəkarlara ehtiyac var. Məncə bu sahələrdə olan boşluqları da doldurmaq lazımdır. 

Çox güman ki, bunun səbəbi hələ də prestijli ixtisas sahibi olmaqla bağlıdır.

- İxtisas seçimində valideynlərin rolu böyükdür. Amma gənclərə məsləhət görərdim ki, maraqları hansı sahəyədirsə, seçimləri də o istiqamətdə olsun.

Hesab edirəm ki, gənclərin üzərində ailələrin təzyiqi azalmalıdır. Baxın, universitetə qəbul olmayanlar intihar edir və bu kimi neqativ hallarla qarşılaşırıq. Valideynlər ölkəyə sağlam vətəndaş qazandırmaq istəyirlərsə, övladlarına sərbəst seçim etmək imkanı verməlidirlər. İnsan yalnız özünü gördüyü sahədə uğur qazana bilər.

Sədan Bünyadova
Foto: Nüsrət Abdullayev
www.oxu.az

Şərh yaz (0)

Şərh yazmaq üçün daxil olun və ya qeydiyyatdan keçin

QEYDİYYAT


Ödənişsiz və sadədir. İndi qeydiyyatdan keç və avantajlar dünyasına giriş əldə et!


Hesab yaratmaqla siz istifadə şərtlərini qəbul etmiş olursunuz

Nömrənizi daxil edin

GəncOL tarifinə qoşulmaq üçün daxil olun və qeydiyyatdan keçin